نقل مفتي الديار المصرية "نصر فريد واصل" عن مصادر سماوية مطلعة أن " علاقة صدام بالله كانت طيبة في الفترة الأخيرة " , كما أفاد مراسل "الأسبوع" التي يرأس تحريرها مصطفي بكري - رضي صدام عنه و زكّاه – أن شواهدا كثيرة تؤكد صحة نقل المصادر السماوية : منها أن الأعمال بالخواتيم , فمهما انتهكت حقوق البشر و خضت في دمائهم , يمكنك أن تحصل في خاتمة حياتك علي خصم خاص و مغفرة مؤكدة و لقب شهيد , خاصة إن أمرت وزراءك بالصلاة , و بنات جيش القدس بالحجاب , و أكثرت من المصطحات الإيمانية في خطبك , و يا حبذا لو أطلت لحيتك و أكثرت من قراءة القرآن و رددت الشهادتين قبل إعدامك ... كما يفعل كل محكوم بالإعدام تقريبا.. و الله غفور رحيم !
كما نقل مراسل آخر لـ " الأسبوع " إجماع علماء المسلمين علي أن صدام شهيد بلا جدال . و ينسخ ذلك الإجماع ما سبق أن قاله رسول الله صلي الله عليه وسلم من أن الله يغفر ما بينه و بين العباد و لكنه لا يغفر ظلم العباد بعضهم بعضا إلا بالقصاص , كما ينسخ أيضا قوله أن " الظلم ظلمات يوم القيامة" .. فمن شتم الأمريكان و قال تحيا الأمة و فلسطين عربية من البحر إلي النهر , لا تنطبق عليه أحكام الشريعة و الثواب و العقاب , و يحصل علي إستثناء خاص إذا توافرت معه بطاقة عضوية حزب البعث العربي ...فالنبي عربي و " البعث "عربي , و الشعوب زائلة , تتكاثر و تموت , و هي فداء لمجد الأمة الواحدة و الحزب الوحيد و الزعيم الخالد .
47 comments:
طب يا شيخ قول كلمه واحده محترمه في حق الراجل او حتي بلاش قول طيب ان الامريكان غلطانيين لانهم صنعوا بطل ..عمرو انا متغاظه من كلامك
تسلم إيدك
أحزننا الشيخ "نصر فريد واصل" - الذى نحبه - بقوله هذا
كنت داخله أحييك فعلا على كلامك وملقتش أحلى من كلمة الأستاذ اللي فوقي طارق فعلا تسلم ايدك
رضوى,أنا مش فاهمك ,كلمة حق ايه في راجل مين ؟ازاي يعني؟على اي اساس انا مش فاهم.
انتي القوميين عدوك ولا ايه يارضوى
ياااااااه
عمرو عزت ...المدافع عن الحقوق والحريات من بهائيين للادينيين لنصارى و و و
مش ممكن
وبتستشهد باحاديث كمان ومش في البخاري ومسلم
امال تاعب قلبي ليه ومش مقتنع بحديث اسماء بنت ابي بكر بتاع الحجاب
على فكرة انا مع نصر فريد واصل
صحيح صدام يستحق الاعدام لا جدال ...بس ما كانش يوم العيد ومش بيد الامريكان ...
هو الان بين يدي ربه...وما يدرينا لعل الله يقبل توبته ويغفر له ما مضى ويتحمل عنه ما بينه وبين العباد ويرضي العباد...دي مش دعوة للظلم لان برضه قد لا يتاح للانسان التوبة وقد لا تقبل توبته وزي ما قد تقبل والانسان مش ضامن .. زائد انه قد يقضي في النار فترة من الزمن (ملايين السنين بحسابات الآخرة ) قبل ما يقضي كل ما عليه من حقوق للعباد ..وماحدش هيستحمل لحظة في عذاب ربنا فما بالك بملايين السنين
الحجاج بن يوسف الثقفي قال قبل ما يموت : اللهم اغفر لي فانهم يزعمون انك لا تفعل ...قال عنها الخليفة العادل عمر بن عبدالعزيز : لو نجا- اي من عذاب الله - فبهذه الكلمة
انا لان انكر اعدامه طبببببعا ...بل وددت لو يعدم الف مرة جزاءا وفاقا على جرائمه ...اما من حيث الصلاة عليه وحسابه عند ربه فديه مش بتاعتنا
هأحاول ما اعلقش عندك كثير بعد كده يا عمرو لاني حاسس اني بقيت ممل (: كل حاجة باعارضك فيها (: بس ما قدرتش ما اعلقش المرة دي
(:
ده طبعا بفرض ان اللي مات ده هو صدام حسين الحقيقي ..وانه تم اعدامه فعلا مش خدعة من خدع هوليوود والموضو كله كان مسرحية هزلية زي ما بأؤمن انا بشكل شخصي يعني ... وانه كان مع المقاومة بجد ودي عمري ما هابلعها
يا أستاذ حازم، القصاص لا يكون في الآخرة بقضاء ملايين السنين النسبوية، القصاص بيكون بين البشر في حياتهم هنا على الأرض.
و بعدين إذا كان على الإعدام يعني فمن السهل جدا أن أجادل و أقول لك أن من أعدمه كانوا مسلمين من من اضطهدهم هو في حياته، و أنهم صلوا على النبي كمان و هم بيعلقوه. لكن لأني فاهم قصدك فمش هجادل في النقطة دي، لكن كمان مش شايف أي معنى لتلمس الأعذار لسفاح و تطويبه بذريعة "يوم العيد" و أسئلة "لماذا الآن" و "بيد من". المحتلين أوغاد و صدام أوغد منهم. خليها في سرك و هنبقى نزيل لهم البيت الأبيض يوم 4 يولو…بعدين.
قاتل مئات الألاف أصبح شهيد !!! لا أريد أن أعلق لأنى فى حالة غيظ شديد وتعليقى سيكون هجوم ضد الأشخاص الذين ينعوا هذا القاتل , تحياتى ياعمرو على هذه التدوينة
ياااه يا عمرو :))
كنت باكتب تدوينة مشابهة بس المدونة مجنناني و مش راضية تنشر
الأسبوع بالتحديد كانت كوميدية جدا
بجد مش قادرة افهم موقف المتعاطفين مع صدام
هو فعلا احنا مش شايفين ان لنا كرامة الا لو حد قرب من الريس؟؟
ولا عشان ماجربوش الذل منه يبقى خلاص هو كويس؟؟
و عن اي توبة يتحدثون؟؟ دا حتى لم يحاول الاعتذار لضحاياه و مش هاقول رد المظالم , مجرد الاعتراف بالخطأ
لي عودة
i think ur absloutly righ, Of course Saddam was a horrible man, he killed so many musilms but, i have never ever heared he killed a single Israeli ( i ask forgivness for him just because he is MUslim).
The other thing that i think Mustafa Bakrei is hypocrate by all means.His newspaper full of fabricatyions and irrationale exageration of things.He is so dangerous.
فعلا أسوأ شيء ظلم العباد...أنا مقتنع جدا إن الانسان لو قصر بينه وبين ربه فربنا كريم وبيغفر...لكن إنك تظلم الناس وتقتل بالعشرات فلا توبة تنفع في هذه الحالة إلا بالقصاص...أصل الناس اللي ماتت واتعذبت دي ملهاش دخل بعلاقتك بربنا...احنا بشر ومحدش فينا بيسيب حقه كده وربنا مش ظالم عشان يسامح شخص على حساب شخص آخر
ده بالمنطق حتى من غير أحاديث بخاري ولا مسلم
عموما موضوع قبول التوبة أعتقد إنه موضوع غيبي لأن محدش فينا له اتصال بالسماء الأولى او السابعة عشان يعرف ربنا غفر لفلان ولا لأ
بس بما إن احنا لينا الظاهر فالعقل والمنطق بيقولوا ان صدام ظلم ناس كتير ودي نهاية طبيعية لأي ظالم...مش عارف بجد الناس زعلانة على ايه؟؟؟
ما في عشرات العراقيين بيموتوا كل يوم بطرق بشعة ومحدش بيزعل عليهم أوي كده
وفي عراقيين ماتوا أول يوم في العيد بردو
عادي يعني
لا فض فوك يا رفيق, أهو ده الكلام .
المشكلة أن الرجل مات من هنا وكل الأمة بمشايخها وشيبها وشبّانها تنوح, وتستخدم كل الكتب بمافيها الكتب السماوية لتسوغ لصدام أفعاله ولتؤكد حسن خاتمته !
الغريب في الموضوع دخول السلفيين الوهابيين على هذا الخط, يعني أنا بإمكاني أن أستوعب قيام بكري وعطوان بالدفاع عن صدام لأنهم قبضوا لكني لا أستوعب أن يقوم مشايخ من السلفية بالدفاع عنه .
يا أخي والله الشيعة بيخوفوا وعنجد, وشعوبنا طائفية بنت شر### يعني لأنه الفرس قتلوه والشيعة لعنوا سنسفيل أبوه أصبح نبي أما في السابق فهو اشتراكية والاشتراكية الحاد والإلحاد يودي بصاحبه لجهنم وبئس المصير !
بغض النظر عن إن أنا كنت متعاطف معاه لحظة إعدامه كإنسان يقف على منصة الشنق وكنت سأتعاطف مع أي شخص يقف مكانه أيا كان هو وأيا كان ما فعله
فبغض النظر عن التعاطف الرهيب ده والشفقة الطبيعية ف رأيي
إلا إني أؤكد إن دخوله الجنة ظلم لن يحدث ولو هو عتبها يبقى أكيد أنا وإنت وغيرنا من اللي ماظلموش حد ولا عذبوا إنسان ولا حيوان حتى هيخشوا بقى مكان أجدع من الجنة عشان يبقى عدل يعني
أمال أخش الجنة ألاقي صدام حسين مستنيني ده أنا حتى تصعب عليا نفسي ساعتها أوي وأندم على حاجات وسخة كتير ماعملتها ورعا وخوفا من الآخرة
ده أنا حتى وأنا صغير كان في عيل غتيت كل مايشوفني يضربني عشان كنت أنيميا خالص وقابلته من تلات سنين بس وكان نفسي أخنقه أو حتى ألطشه قلمين خفاف كده بس قلت بلاش ظلم هو يعني عشان تخنت هتفتري عالناس الغلابة
بس عموما طالما الشيخ نصر بيتكلم عن مصادر سماوية مطلعة يبقى كلامه صح أمال إيه هو في عالم أزهر يغلط أبدا
مش فاقعنى ألا حكايه أعدموه أول يوم العيد دى..يعنى أول فبراير ماشى..وجت على دى ماأحنا بناكل على قفانا وقفه وعيد..عاشوره وكريسماس..والا نسينا.....خالد
مزمز :-
الحقيقة مش عايز أعلق ع الموضوع نفسه لأنى علقت عليه للصبح عند مالك وابن عبدالعزيز....لكن حابب ألفت نظرك لنقطة مهمة
كلامك اللى بتقول فيه :_
إلا إني أؤكد إن دخوله الجنة ظلم لن يحدث ولو هو عتبها يبقى أكيد أنا وإنت وغيرنا من اللي ماظلموش حد ولا عذبوا إنسان ولا حيوان حتى هيخشوا بقى مكان أجدع من الجنة عشان يبقى عدل يعني
نصيحة من أخ تستغفر ربنا وتصلى ركعتين استغفار لأن كلامك هزل فى موضع لايجوز اطلاقا...وتتفق معى أن لا يوجد مخلوق يملك موازين العدل الالهى والتجرؤ على الخوض فى هذا يضعك فى ذنب عظيم
الكلام ده لمنطق الكلام المجرد وليس دفاعا عن صدام أو غيره
من بعد غزو الكويت والحصار المفروض على العراق والقوات اللي قعدت في الخليج كنت بتساءل في نفسي ليه الدول العربية او مصر على اقل تقدير لا تدس احد في قصره لتسميمه او ما تبعتش فرقة عمليات خاصة من بتوع الـ 777 لاختطاف صدام ومحاكمته او قتله في قصره على اقل تقدير بدل ما هو مدي ذريعة للامريكان للبقاء في الخليج + الفظائع اللي ارتكبها طيلة عمره وآخرها في غزو الكويت
بس اما كبرت شوية فهمت ان مصر-السعودية-الكويت-سوريا.....الخ ، كلهم ما يفرقوش كثير عنه
انا ما بدافعش عنه فهو المفروض كان يعدم ان عاجلا او آجلا ...ده واجبنا في الدنيا..واجب القصاص ..اما في الآخرة فديه بتاعة ربنا
أنا معاك إنه جزاءه العادل وإن الدفاع عنه لأنه كان من أنصار إن هو اللي يسحل ويظلم في شعبه إنما الأمريكان لأ ده استهبال
واتغظت جدا بقى لما لقيت نقابة المحامين كاتبة اسمه في لوحة واحدة مع عمر المختار وجميلة بو حريد
بأمارة إيه يعني؟؟
مافيش اختلاف على إعدامه
إنما التوقيت كان مستفز فعلا- حتى لو دلالاته موجهة للزعماء الأفاضل الخالدين على الكراسي- خد بالك دي مش أول مرة الهجوم على بغداد كان أول رمضان برده
أنا بجد اتنكدت ..قاعدة صباحية العيد مش باتفرج على حاجة غير إعدام بني آدم وهو حدث مش سهل عشان أتجاهله يعني وأروح أتفرج على "العيد فرحة"ا
الحاجة التانية هي كمية الشماتة
بصراحة كحد بيتفرج من بره ماقدرتش أستسيغها أبدا و حسيت إنها خلت الضحية في مستوى لا إنسانية الجلاد السابق
دي بس ملاحظة مش حكم على شعور الناس...معرفش لو كنت مكان حد فيهم وصدام قتل حد من عيلتي كنت هأحس بإيه لحظة إعدامه
الصارم الحاسم:-
بقدر ماقرأت فى هذا الموضوع على جميع المدونات من أراء أتفق أو اختلف معها بقدر ما ذهلت من تعليقك الأخير....يعنى ايه مصر أو غيرها تبعت فرقة اغتيالات أو تدس حد يسممه؟ كلام مين فى الدنيا يقوله ده ؟
بأمارة ايه ان شاء الله نشتغل أوصياء على الشعوب أو مرتزقة اغتيالات؟
وايه معنى مايفرقوش عنه كتير أو يفرقوا عنه؟ يعنى سيادتك مع التوجه ده فى المعارضة؟ بنفس المنطق هل تقبل حد يعمل ده حاليا مع رئيس بلدك؟
يا اخ
m
انا اللي ذهلت من كلامك
ده كان واحد بلاه على العرب والمسلمين كلهم...ادى لتدخل اجنبي وموارد مهدرة فلوس ونفط وقات عسكرية في الخليج وتفرق كلمة الأمة .....كان الأولى حد يتحرك ويخلص منه طالما ان النصح لم يجدي معه بالاضافة لانه كان قاتل فعلا
ولا تضع اعتبارا لحدود سايكس بيكو اللي وضعها الاستعمار ...لكنا واحد ..مصر-العراق-السعودية-ليبيا-الأردن ...الخ كلنا واحد في الآخر ولازم حد يبقى ايجابي ويتحرك
لكن ده لم يتم طبعا لان مافيش حد بيفكر كده...كله بيفكر في الحتة الضيقة اللي عايش فيها ..ومش مهم الدنيا تتهد عليه لغاية اما توصل لحدوده هو
صلاح الدين بدأ كوزير لمصر ولكن عينه كانت على القدس ...وقطز اما حارب التتار حاربهم في فلسطين خارج حدود مصر....سليمان الحلبي السوري قتل كليبر في مصر للفظائع اللي كان بيعملها في المصريين...لو حبيت اعدد الأمثلة مش هاخلص
انا مش مع التوجه ده في المعارضة فقط لانه هيحول البلد لفوضى لكن اذا كان يوم هناك سلطة شرعية قوية لمحاسبة اي مجرم مهما كان مركزه وقادرة على فعل ذلك دون ان تسود الفوضى فمفيش مشكلة خالص
دمك خفيف جدا ويا ريت تكتب باستمرار بهذه اللغه الساخره الخفيفة وتبعد عن الكلكعة ..بس يا فالح انت جي في الهايفه وبتتصدر كل اللي همك في الليلة صدام شهيد ولا لا ؟ طب يا سيدي خلاص مش شهيد ..لكن انت شايف ان من حق الامريكان يحتلوا بلد عربي كامل ويعتقلوا رئيسه ويحاكموه بطريقتهم الخاصة جدا ويعدموه ساعة صلاة العيد ؟ وحضرتك شايف ان احنا نقولهم متشكرين ؟ يا استاذ عمرو كان لازم يتحاكم علي جرايمه بس اللي يحاكمه شعبه مش عملاء الاحتلال ولا الاحتلال ولا المستر بوش ..اصحي يا عم عمرو
بص يا عمرو
انا كمان فى حاله غيظ شديده زى علاء السادس عشر
الفكره انى فى العيد قابلت كل العائله وكل كان فى حاله عجيبه جدا من الحزن والاسى والاحساس بالاهانه والكل بتكلم عن البطل اللى اتعدم
فضلت ساكت وبحاول اكتم غيظى واقول ما انفجرت اتعامل معايا الكل على انى خاين وانى اتجننت خلاص
لما متدافعش عن واحد دبح الالاف تبقى خاين ولا متعيطش على جزار وفاشى معناها انك كبتقش مسلم
الموضوع بقى صعب زى الراجل بتاع عمرو المختار فاكره
سلام عمرو
سلام لثباتك مع "الإنسان" دوما..دوما
مع اني عنيد..ومبحبش الثناء على كلام حد ..وبدور دايماً على نقاط الاختلاف مع آراء الآخرين...
إلا إني موافق كلامك بنسبة كبيرة
بس كل واحد ورأيه..
ولكن مصطفى بكري بالغ في آراءه وعاطفته تجاه صدام..واعتقد إن القوميين بالتحديد وتبنيهم للدفاع عن صدام ..هو في الاساس دفاع عن عبدالناصر..لأني اظن إن إدانة صدام شعبياً هي ادانة لجمال عبدالناصر..الفرق بينهم مش كبير..علشان كده القوميين واخدين المسألة حياة او موت..
لكن..الموضوع له دورة إعلامية وبعد كده يخمد مثل ما قبله..
ملحوظة: القوميون ..مش سكان شارع القومية العربية في امبابة "حي شعبي في الجيزة ..اتجوزت منه "..لكن المقصود بيهم اصحاب الفكر القومي "إستسهالاً" يطلق عليهم الناصريين..!!
ملحوظة تاني: بعض احيان بيجيلي خاطر عن مصطفى بكري إن كتاباته موجهة من جهة ما تبع النظام ..يعني امن دولة مثلاً أو حد في النظام..ولاوني مش من هواة التصنيفات على الاساس ده..المهم إني مش بطمن لكتاباته..
أرجوك يا عمرو ماتفكرنيش...ده أنا مفقوعة بشكل من كمية التعاطف مع صدام...متغاظة فعلا....
يعنى احنا فعلا كلمة تودينا و كلمة تجيبنا...تدوينتك يا عمرو كانت كافية جدا انها توضح ده...
لم أتمالك نفسى بعد قرائتى لجريدة الأسبوع اللى الأستاذ مصطفى بكرى فيها قالبها مناحه...و ما شاءالله الأستاذ خياله واسع أوى...بيتخيل ان اللى كانوا بيعدموا صدام حاولوا يقنعوه انه ينصاع ليهم و هما مش هيعدموه لكنه بكل اعزاز و بطولة رفض....يا سلااااام يا ولاد
دلوقتى بقى بطل ..الله يرحم أيام ما كانوا بيشتموه لأنه جوع شعبه و انه كان السبب فى اللى حصل للعراق سواء العقوبات الاقتصادية أو غزو العراق..
عشان اتعدم يوم العيد بقى بطل...و عشان محاكمته كانت محاكمة هزلية و كانت على ايد الامريكان...يبقى بطل
منطق عدو عدوى صديقى أنا مش مؤمنة بيه خالص...و مش معنى ان الامريكان قلبوا عليه يبقى نغير موقفنا منه و يبقى بطل عشان هو عدو الامريكان...
الراجل كانت سمعته سابقاه...و كلنا عارفين اللى عمله...
أنا لا شمتانه انه اتعدم و لا حزينة عليه...بس كل ظالم ليه يوم...
فى النهاية يا أستاذ عمرو...أرجو الا تنسى البحث المهم الذى بدأته التدوينة السابقة عن "حمديه التيتى"...ندعو الله ان يوفقك فى هذا الانجاز المهم...أحسن من الحديث عن صدام
:D
تحياتى
ياشيخ حرام عليك ده مات خلاص سيبوه بقه فى حاله ربنا ها يحسبه وبعدين فين اذكروا محاسن موتاكم ولو انهم قتلاكم بس مش مهم اهو مات والسلام
بس حرام المفروض ان ربنا هوه اللى يحاسبه مش احنا
سلاااااام
m5m: يا عزيزيشكرا على النصيحة جدا وأستغفر الله لو كنت أقصد التألي عليه بس خدت الموضوع هزليا لأن اللي بيقولوا إن صدام شهيد برضه هزليين وبيتألوا على الله ولو كان زي ما احنا عارفين الحكم بالظاهر ولله البواطن فبالظاهر طبعا والظاهر جدا كمان إن الحاج صدام مستحيل يكون شهيد فأنت معي أن الشهيد لا يدخل الجنة لو أن عليه دين فما بالك لو أن عليه وفي رقبته دماء الكثير ويحمل ذنبا كبيرا وأكبر الإثم هو وغيره من أعزائنا الحكام عن ما آل إليه حالنا المتردي وإذا كان الله كتب على نفسه العدل فقد علمنا أنه قد يسامح عبده في ما افتراه على الله وفيما فرط في جنبه أما إذا تعلق الحق بالبشر فإن تسامحهم مع المذنب هو المحك وقرارهم سيكون الفاصل ولا أظن أحدا فقد أباه أو أمه أو ابنه أو أحد أحبائه على يد مستبد طاغية قد يسامحه لمجرد التسامح وإنما لابد أنه منتظر عقابه العادل عند الله حتى يشفي صدره
ويشف صدور قوم مؤمنين
ده كل الموضوع وأؤكد أنني كمواطن عربي لي حقوق على كل هؤلاء الحكام لن أتساتمح مع أحد منهم لأني بشري لست نبيا ولا إلها لكن الله قد يسامحهم لأنه الرحيم أما أنا وغيري الكثيرون لن يتسامحوا أبدا...
أبدا...
الصارم:-
لازلت عند رأيى...أسلوبك تحريضى غير متزن...وكلامك عن تجاهل الحدود بين الدول هو تهريج يدل على أنك لازلت تعيش فى حلم الخلافة الاسلامية حينما كان سيدنا عمر مثلا يرسل أحد عماله وهو جالس فى مكة الى الشام مثلا ليعزل الوالى....ياعزيزى تنبه...ليست كل أوهام الاخوان المسلمين حقائق
تخبط الشعوب العربيه في الاحساس بإعدام صدام ماهو إلامؤشر طبيعي للحاله "الملخخبطه" التي نعيشها
راح الجنه راح النار ده أمر ربنا
مات معدوم مات في سريره
ده أمر ربنا
قتله الامريكان او اغتيل على يد من ظلمهم
ده امر ربنا
لكن أمرنا نحن
هو وجود الامريكان هناك المستفز
و توقيت الإعدام المستفز
و المسرحيه الهزليه من قبض عليه ومحاكمه صوريه و تصويره ظالمناو تصورنا أنه مظلوما
الأمور بقت ملخبطه لدرجة اليأس
و نفسي أعيش و أقرا اللي حيكشفه التاريخ بعد السنين عن هذه اللخبطه
تسلم إيدك علي المدونة ده
بس هو فيه حاجة
أصلا فيه خلاف في إمكانية غفران قتل المسلم بين العلماء، سواء بأه بقصاص أو بدون
وبرده حاجة تانية
الراجل ده كان أصدر قرار إنه من يقتل في حالة سكر لا بعاقب، وآلاف من المصريين والسودانيين مانوا بكده زالكل عارف حكاية النعوش.
واليبص في تاريخ صدام الوضيع: يعرف إن عائلته كلها ولا كانت بتصلي وكانوا بيقضوا وقتهم في شرب الخمر
زيجي مفتي الدولة والحكومة الشارونية إللي عندنا يصفصط بمعرفش إيه.
التوبة بتاعته ده زي توبة فرعون لما قال آمنت برب موسى وهارون
معلش يعتي ناس كتير قوي بتتكلم زلا ليها في الدين ولا التاريخ ولا السياسة ولا الفقه ولا إبن ******
ربنا يهدي الجميع ويزيدهم علم
بص يا عم عمرو
من المرات القليله التي اتفق معك فيها ولكن للاسف مسرحيه الاعدام الهزليه جعلت منه بطلا وخرجت الصحف المواليه لصدام بالتهليل به
ولكن لا نقول عليه سوء انه مات لانه اذا ذكرنا التاريخ فاعتقد انها حقبه من الفجور
مسألة إعدام صدام للأسف تم تناولها على نطاق واسع من منظور شخصى يتعلق بصدام شخصياً . القضية ليست فى هل أخطأ صدام حسين أم لا. بل فى القواعد التى ينبغى اتباعها فى المحاكمة والجزاء والتى ينبغى أن تعتمد على احترام مبادئ حقوق الإنسان والمحاكمة العادلة والشفافة البعيدة كل البعد عن الحسابات السياسية. بما فى ذلك عدم اعتماد عقوبة الاعدام كأحد أشكال الجزاء. كل تلك الأسس لم يتم مراعاتها فى محاكمة صدام كما لا يتم مراعاتها فى العديد والعديد من المحاكمات فى العالم العربى بل ودولياً فى الكثير من الحالات. وهذا الأمر فى العراق بالتحديد يضاف لسجل الديموقراطية الأسود الذى تتحدث عنه امريكا بالاضافة الى الحكومات العراقية المتعاقبة. فالحديث حول اعدام صدام ينبغى أن يتم من منطلق مبادئ حقوق الإنسان. ولا ينبغى القول بأن حقوق الإنسان أساساً غير مطبقة أو أن صدام لم يكن يحترمها وأن الجزاء من جنس العمل. لأننا ننادى بقواعد إنسانية وندعو للعمل بها وتطبيقها سواء على صدام أو على أى حرامى فراخ، تحقيق العدالة هو الفيصل والنزاهة فى الحكم والشفافية فى الممارسة هى القواعد التى يتبغى اتباعها والدعوة لها والدفاع عنها
و الله يا عمرو انت بتنفخ في قربة مقطوعة
نظرية عدو عدوي صديقي احنا عايشين عليها في المنطقة ، بل و حتى على مستوى الفصائل السياسية المصرية، و ده أمر أبعد ما يكون عن المنطق ، فالذي يحارب اسرائيل و أمريكا لا يجعله بطلا و لا شهيدا إلا في إطار من تحكيم مفردات المنطق و العدالة ، و ليست العواطف المزغللة دينيا
رغم أني ضد حكم الاعدام مطلقا ، إلا أن صدام استحقه بجدارة ، و كذلك آلية الرؤية و التحليل لدينا
تحية على الكلام الموجز الفعال
قشطة تون .... هي الخلافة بقت تهريج واوهام وترهات ...الله يرحم ايام ما كانت الخلافة شئ لا يتخيل المسلمون الحياة من دونه
سيدنا عمر كان بيبعت رسوله لتغيير واليه وهو قاعد في مكة من غير ما كان يبقى عنده لا طيارات ولا اقمار صناعية ولا اجهزة امن دولة ولا مخابرات بتسمع دبة النملة ولكن كان واخد باله من رعيته كويس اوي بامكانيات عصره ...احنا بس اللي خستعنا اوي.....حتى في تفكيرنا ...معذرة
الخلافة يا سيدي الفاضل ليست ترهات بل بالعكس ..اذا نظرت للدول الكبرى هتج امريكا مؤلفة من 50 ولاية بحجم اجمالي يقارب قارة اوروبا واكبر من استراليا مثلا ..والاتحاد السوفيتي السابق كان اكبر من هذا
ده حتى ان فكرنا فيها كفدرالية هنلاقي انها افضل حل في النهاية هي سياسة واحدة تجمع الكل
وان فكرنا فيها كولايات متباعدة بس كله همه الأمر بالمعروف والنهي عن المنكر ... بمعنى ان مش معنى ان شعبي مستريح اسيب الشعوب التانيةتتحرق وتولع واقول اصل دي بلد تانية وانا ماليش دعوة
مفيش حاجة اسمها ماليش دعوة في الاسلام طالما انا قادر اتصرف-ده اذا كنت قادر اتصرف بمفهوم ما استطعتم من قوة -وعلى هذا الاساس كان تشريع الجهاد في سبيل الله من اجل المسلمين وغير المسلمين حتى ان ان لم تكن لي مصلحة مباشرة في التدخل عشان ساعتها هتبقى انامالية
وان معجبكش كل كلامي ده يبقى دور على فيلم امريكي اسمه
AIR FORCE 1
دور فيه على كلمة الرئيس الامريكي في المؤتمر اللي في اول الفيلم - هتلاقي انه اسلوبه اخلاقي اكثر مننا-بس طبعا ما بينفذوش ده في الواقع
أن تختلف مع فتوى عالم وتعلن عدم الاتزامك بها لأن حسابك على الله وحده فهذا من حقك..
لكن أن تسخر من ذاك العالم بذاك الأسلوب المقيت والسخيف فهذا ليس من حقك..
أنا أختلف مع فتوى الدكتور نصر فريد واصل ولن أعتبر صدام شهيدا أبدا الا اذا خرج كل ضحايه من قيورهم وقالوا أنهم سامحوه..
لكنى أبدا لن أسخر من عالم كبير كالشيخ نصر فريد واصل
عمرو أنا مش متغاظة من كلامك...!
انا معاك جدا وضد كل اللي حصل بعد الاعدام يعني بجد احنا كان لازم نعمل حملة ضد الامريكان واستخفافهم باعيادنا مش نقعد نمجد في حاكم مات الله يرحمه هو رحل وترك وراه اجيال مدمرة فحسابه عند ربنا والناس ومظالمها حسابها يوم القيامة وربنا يرحمنا من فرق المكفرين ومدخلي الجنة يارب
حاكم جائر متمسك بعزته بدينه ووطنه أحسن مليون مرة من الحكام اللى بايعين القضيه
ROMIL
إخواني الافاضل: اذكروا محاسن موتاكم واعتقد انه من غير المناسب ان نترك الاصل و ننهال علي الفرع بالنقد و ذكر المساوئ. اوافقكم الراي بان صدام له ماض اسود ولكن الا ترون ما قد وصل اليه الامريكان من جبروت و ظلم شديد بدايه من اتهام العراق بحيازة اسلحة دمار شامل كذريعة لإحتلال العراق و تدمير قدراته العسكريه و العلميه و قد تم هذا ليس فقط بيد الامريكان و اعوانهم من باقي الدول الغربيه و لكن ايضا و يا حسرتاه تم بمباركة وتاييد و مساعدة الدول العربيه التي نحن جزء منها وننتمي اليها فمنهم من فتح حدوده ومنهم من سخر مطاراتة و مواردة الماليه لطائرات الحلفاء و عسكرهم حتي يتسني لهم قصف العراق و قتل مئات الالاف من نساء و اطفال الشعب العراقي دون حتي ان يشجب بكلمه إعتراض. وقد أمرت امريكابإعدامصدام حسين حتي يكون عبره لمن يتجراان يعارضها و يقول لا و صدام قد قالها مرارا و تكرارا حتي مات علي موقفه بعزه وكرامه.
الاحري بنا ان ننظر الي حالنا نحن الاحياء و ان ننظر الي اي هوان و ضعف وتخاذل قادنا اليه حكامنا المغاوير و اصبحت المعادله التي يؤمنون بها "إذا اردت ان تحتفظ بعرشك اسقي القهر و الذل لشعبك وكن خادما مطيعا و عبدا ذليلا لإرادة الإدارة الاميريكية وليذهب الشعب الي الجحيم المهم انا ماشي مع امريكا في السليم"
والله بقى كويس مش كويس أهو مات وما بنفعش غير اننا ندعيله بالرحوة نذكر محاسنة ولو مالقيناش نسكت
إنما نقول شهيد ...ونقول مجرم هيروح النار ,,,,,,,والله مايتهيأليش إن نصه لا نصر فريد واصل ولا مصطفى بكري ولا عمرو عزت هم اللي بيحاسبوا في الأخرة
Non of us can determine for sure if he will go to hell or heaven...
God will decide that...
Mish 7anta2allah 3ala Allah. HE only knows what will happen to Saddam.
خلاص الكل بيفتي و يتكلم كان الفتوي ممكن تكون هي كمان بالعند في امريكا
يعني كاننا بنقول قتلتوه و الله لنعمله شهيد و بالعند فيكم
تنويه
في الحقيقة أنا أعلق علي كلام من نصبوا أنفسهم متحدثين باسم السماء
و حاسبوا الرجل و أعطوه اللقب
لا أهدف للانتقاص من قدر المفتي و لا أي أحد آخر
و لكن أهدف بوضوح للسخرية و الإستهزاء و إزدراء و عدم احترام ما قالوه
فعلا مسخرة
و بالنسبة لموضوع " اذكروا محاسن موتاكم " فيبدو لي هزلا استخدام هذا الحديث في هذا المقام
فالحديث أولا مقامه التجمل بذكر محاسن الموتي وقت موتهم للتخفيف من الأهل و إحسان الظن بالميت و الدعاء له بالرحمة
ثانيا : الحديث يحث علي ذكر المحاسن و لا ينهي عن ذكر المساويء
أليس كذلك؟
و ثالثا إذا كان الرجل من المؤثرين في التاريخ و في عدد كبير من الناس فالأمر يختلف
ضروري طبعا ذكر المساويء
لأن الأمر هنا مجال تقييم نموذج في الحكم يدافع عنه البعض حتي الان
و التقييم يطال الشخصية بصفتها - صدام رئيس الجمهورية - و ليس بصفة شخصية
و إلا أصبحت كتابة التاريخ غيبة و نميمة و حرام
أو تصبح كتابة التاريخ هي كتابة مدائح الحكام بدعوي الالتزام بالسنة النبوية
!!!
السلام عليكم
والله يا حبايبي إن كان صدام ظلم فهو قد اقتص منه
إن كان هجر أسر من مدنهم فأسرته كلها أيضا مش هجرت بس ده اتبعترت
وإن كان قتل أبناء من شعبه فأولاده قتلو
وإذا كان اعتقل ناس من شعبه فهو أيضا اعتقل أكثر من 3 سنوات وحوكم في محكمة هزلية
وإن كان قتل أهو اتعدم في حاجة أكتر من كده
يا أخي اذكروا محاسن موتاكم ماهو نظام حكمه مايختلفش عن أي نظام عربي غير أنه الوحيد الذي عادى أمريكا والوحيد الذي تجرأ بضرب عمق إسرائيل
أولا : التدوينة حلوة أوي يا عمرو
ثانيا : أحب أزفلك البشرى إن أخبار الأدب الأسبوع ده واخد التدوينة دي
هتلاقيها في صفحة تمانية على اليمين، وهأحاول أعملهالك scan
ملاحظة : (أنا ما بأجيبش جرايد بس واحد صاحبي خللاني أجيبه علشان خدوا من عندي كمان حتة :))
شكرا يا مصعب
أنا اشتريت العدد
أخبار الأدب من المطبوعات اللي انا محافظ علي شرائها من قديم الأزل
هناك حوار حول موضوع النقل هذا علي مجموعة المدونين المصريين
أقول .. خل عنك بس
أنا حاسس أنكو بتتفلسفو يا جماعة .. ورأيي انكم تتهتموا باموركو ووترحمو على الميت او تسكتو عشان لا انت ولا هيه تحكم عليه .. وما تزعلوش مني وسلام
Post a Comment